Арилжаа наймаанд асар их хөрөнгө хаяж байгаа PSG клуб Дэвид Бекхэмийг Францад авчирахаар өндөр хэмжээний цалинтай санал тавихаар бэлдэж байна. Францын Le Parisien сонины мэдээлж байгаагаар тус багийн төлөөлөгчид лхагва гаригт Лос Анжелест зочилж Бекхэмтэй уулзах аж.

Өдгөө 36 настай Бекхэмийн ЛА Галакситай байгуулсан гэрээ ирэх 11 сард дуусна. Тиймээс PSG-гийн спорт эрхэлсэн захирал Леонардо Английн шигшээн ахлагчыг дахин Европт авчирах боломжтой гэж үзэж байна. Тэд Бекст хоёр жилийн 4-5 сая еврогийн санал хүргүүлж байгаа юм. Одоогоор Францын багт Хавьер Пасторер хамгийн өндөр цалин авч байгаа.

“Бекхэм бол хөлбөмбөгч гэхээсээ илүү супер од, дэлхийн бренд болсон хүн. Түүн шиг нэр хүндтэй хүн манай багт ирснээр багийн амжилтаас гадна нэр хүнд ч дээшлэх болно. Бид хоёр АС Миланд хамт ажиллаж байсан болохоор асуудал үүсэхгүй байх гэж найдаж байна”
хэмээн Леонардо ярилаа.
Мөн Английн премьер лигийн Тоттенхэм, КПР багууд Бекхэмтэй нэр холбогдоод байна.